Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн республика ыар сүтүктэннэ. Бу дьыл тохсунньу 18 күнүгэр киэһээ 17.00 чааһы ааһыыта улаханнык ытыктыыр, күндү доҕорбут, Кузьминнар дьиэ кэргэн бас-көс киһилэрэ, амарах аҕалара, элэккэй эһээлэрэ, СР культуратын үтүөлээх үлэһитэ, І-ІІ-с Баатаралар, Дьаҥхаады, Бүтэйдээх нэһилиэктэрин бочуоттаах олохтооҕо, СР ырыа айааччыларын-мелодистарын сойууһун чилиэнэ, Мэҥэ Хаҥалас улууһун «Дьүрүлгэн» ырыа айааччыларын уонна ырыаһыттарын түмсүүтүн тутаах киһитэ, СР баянистарын, аккордеонистарын уонна гармонистарын Сойууһун чилиэнэ, «Мэҥэ баянистара» айар түмсүү салайааччыта, республика бастыҥ баяниһа, биллэр музыкант, мелодист, хоһоонньут, тэрээһиннээх тэрийээччи, кэрэҕэ көҕүлээччи, сатабыллаах салайааччы, уһулуччулаах уһуйааччы-учуутал, фольклорист, наставник, этно-музыкант, общественнай деятель, үлэ уонна сцена ветерана, дэгиттэр талааннаах, ураты чаҕылхай, киһибит — Владимир Васильевич Кузьмин хомойуох иһин, биһиги кэккэбититтэн туораан, сирдээҕи олоҕо түмүктэммитэ олунньу 27 күнүгэр, номнуо 40-с хонуга буолар. Онон сибээстээн кини олоҕун биографиятыттан бар дьоҥҥо анаан кылгастык билиһиннэриэхпин баҕарабын.